قصيدة:: بعنوان " العودة " (نداء الى كل عراقي مغترب)

أرجـع يالرحت بعيد عن بغـداد
وسكنت هناك دولة ما هي دولتنه

حقك من رحت جان الوضع مو زين
تفجيـر وقتـل وأرهـاب موتنه

بس هسه الوضع مو نفسة ذاك الجان
عراقييـن كلنا وهـاي طيبتنـه

بعد ماكو جوادر مأتم وأحـزان
كبل جانت كبل بسنين شدتنـه

عبرناها الشـدايـد والحمد لله
وهالدمع اليصب ها دمع فرحتنه

كافي من الغرب مو صار خمس سنين
مل حتى الغـرب مو كثر غربتنـه

أرجع للأهل للصبحة والأحباب
نلتم مـن جـديد يا محلة لمتنـه

أرجع للنجف لدهوك والأنبـار
لتكريت وسماوه أرجع لبصرتنه

أرجع للفضل للثورة والنعمان
مناطقنه اصبحت والله جنتنه

يــا دجلة الخير يا أم البساتين
أرجع وأرتوي من ماي دجلتنه

أضربلك مثل صغير عن بغداد
حاول تفتهم وتشوف حيرتنه

بغداد الحضن والشرف والديرة
والأم والحبيبـة وهي هيبتنه

عايف هالحضن وساكن بغير احضان
وعفت هذا الشرف وهجرت ديرتنه

أرجع والنصر والله يعود وياك
وبيدك هاي بيدك شيل رايتـنه

أدري أنت وفي وأدريك ما مرتاح
وتصيح الله واكبر لغربة ذلتنـه

وأدري أنت أصيل ومعدنك يا نوع
وأدري انت الشهم والغيرة فزعتنه

أفرض بالغرب لاكاك ملك الموت
وبتراب نزلت ما هي تربتنـه

درجع والجواز هناك شمرة بعيد
ومزكها الأقامة وهاي فرحتنه

أرجع والفرح ينتظرك ابغداد
أرجع و الوطن محتاج وكفتنه
أرجع و الوطن محتاج وكفتنه

أرجع والفرح ينتظرك ابغداد
أرجع و الوطن محتاج وكفتنه
أرجع و الوطن محتاج وكفتنه

الله يسمع منج يا رب
ابدعتي اختي
من اجمل ما قرات اليوم
وسنكون بالجوار بانتظار المزيد
فراشه بغداديه

الوطن غالي وعزيز بگلبي اضمة
والوطن هو النفس محتاج اشمة




الوطن دجلة وزعل عاف الفرات
وياشمل الاحباب ياهو الي يلمه




الوطن جنسيتي عنواني وكياني
الوطن كعبة جهاد وما هو كلمة




الوطن بيت الشرف وعصابة امي
الوطن صرخة عبير وطيف سلمى




الوطن دمعة نزلت تروي الشفايف
الوطن صرخة طفل مشتاگ لامه