رسالة من طفلة لعمو نوري المالكي

--------------------------------------------------------------------------------
هلو عمو نوري المالكي الحباب
عمو اني اسمي امنة عمري سنة و شهرين كلش احب ماما و بابا و جدو و عماتي كلش صحيح بعدني صغيرة بس عمتي تكول بالعراق الجهال يعرفون اكثر من الكبار .

عمو اني زعلانة من عدك كلش لان ابوي جان يكول انو العراق لازم نحميه بيدنا و لازم احنا نرجعه مثل كبل و احسن و ابوي جان يخدم البلد و جوي ناس مو زينين يكولولهم قاعدة و كتلوه و هو بعده صغير بالعمر صحيح هو طويل كلش اكبر مني بس يكولون صغير بالعمر جان كلش احبه و يحبني جنت ماخاف من يكون يمي..

عمو كلش زعلانة من عندك لان امي كامت تبجي و بيبيتي و عماتي و لهسه يبجون كلش علموده و هو مبقى يجي يمي , عمو جان يلزم ايدي و ياخذني يجبلي سوالف حلوة و هسه ماكو.

عمو زين ليش عمو الشرطي ماحماه و مخلاهم يكتلوه جان يكدر يحمه , اني سئلتهم كلتلهم ليش محماه كالو عمو المالكي هو كله لاتحميه .

زين عمو المالكي ليش الرواتب كلش قليلة ليش متنطي للناس شوية فلوس علمود يشترون العاب للجهال مالتهم اني عندي صديقات خطية ملابسهم مو زينة كلتلهم ليش كالو عمو المالكي مدينطي فلوس لابهاتهم هوايا عمو انطيهم خمس تالاف دينار علمود يشترون لجهالهم العاب و خمس تالاف علمود ملابس خطية لان اجا العيد و بعدها ملابسهم محلوة.

عمو همين خطية عمامي اثنين يشتغلون بالجامعة يكولوهم دكتور , هما مايعرفون يضربون ابرة و ميلبسون ابيض بس مادري يكولولهم دكتور , اكو عمو جارنا مايحبهم راح يم عمو الشرطي مالك و كاله هذول مو زينين اجا عمو الشرطي اخذهم و خطية هما مو مسوين شي و لهسه هما يم عم الشرطي و مالهم ذنبي بشي ابداً عمو حباب خليهم يطلعون..

عمو اني عندي جدي و عماتي و عمامي و ناس كلش يجون يمنا و يحملوني بس خطية اكو هوايا هم صديقاتي ابوهم مات و انكتل و ماعدهم اهل ..

عمو المالكي انطي للناس فلوس و كول لعمو الشرطي خلي يحميهم لان خطية
و اذا مسويت هيج راح نروح يم حكومة ثانية
و راح اكول لعمو الشرطي مالتهم عليك
يله باي عمو